CIA wil ti xinesixe ofitsier mit wiiteos lose .

TE SPICHEEL CIA wil ti xinesixe ofitsier mit wiiteos lose . 8 xtune • 2 minute leese tsayt Am tonerxtach, hot ti CIA tswaay wiiteos in te xprooch puplitseyert fer naye informante fon China se rekruteere. Mit tëm unkeweenliche aanxtrëngung, fersuucht te US kehaymnis tiinst ti “Kroose Fayer Walt” se penetreere. Ti CIA hot am tonerxtach tswaay wiiteos in xineesix xprooch puplitseyert, woo kemacht kep sin fer ti ofitsier fon China preserweere fer ti kexichte mit te USA aus teele. Tas is te letste puplitseyert fersuuchung fon te intelijëns kemaynte fer ti intelijëns samerfasung iwer Washington sayn strateejixe rival xroo mache. Ti tswaay wiiteos woo uf te sosiaale weepe fon te CIA kexrip kep sin, tsayche fiktiwe xëne: en hooche ofitsier fon te xinesixe komunistix partii (CCP) un en yunge ofitsier fon te rechiirung mit akses an xlechte informatsioone, sin fon tëm xinesixe sisteem entxënt kep un tuun sich noo te CIA wende. CIA suucht noo informante . In een interwiew mit Fox News, hot te Direktor fon te CIA, John Ratcliffe, kesaat tas eene fon te haupste aarwayte fon te aarwayt is ti intelijëns samele. "Meyer fersuuche tas mache torich ti layt woo uns helfe khëne ti kexichte se xteele", hot Ratcliffe noch kesaat. Ti ëntxlus khomt als teel fon en kampanye woo ti CIA im oktoower aan kefang hot, fer naye informante fon China, Iran un Nort Korea se rekruteere. Instrutsioone fer ti sicherheet fon te kehaymnis tiinst sin im internet puplitsiirt kep. Een friirix fersuuchung in Ruslant hat xon erfolk kriit. USA is net ploos interesiirt in kontripuytsioone . Ti CIA is tesweche sich sicher tas ti wiiteos ti internet restriktsioone fon China "Kroose Fayer Walt" penetreere un ti kewëntliche autiëns erkhëne. “Wën tas net funktsiooneere teet, teete mer net mee wiiteos mache”, saat en CIA-ofitsier fer ti Reuters, un saat tas China ti haupst intelijëns prioriteet fon te ajency waar in en “woere jeneratsioons konkurëns” tswixe te USA un China. Te CIA-Ofisier hot aach kesaat tas ti USA sich net ploos intereseyert hot in te kontitsioone fon te spionaaj, awer aach in informatsioone iwer ti forterung fon te siëns, militeyer un siber teknolokii, weyertiche ekonoomixe data un auslëntixe politike kexichte fon China. Ti xinesixe ambassade in Washington hot net klaych keantwort uf een ferlange fer komentaare iwer ti wiiteos. China hot ti USA in te ferkangheet imer noch aankesaat tas se en systematixe desinformatsioon kampanye keeche tas lant am mache waare. Ti intelijëns ajencys fon te USA hon im mërts kesaat tas China ti kreeste militeyer un siber-pedrohung fer ti USA kept.