Ti rating ajency Moody’s tuut ti kredit wërter fon te USA runer xtele

TE SPICHEEL Ti rating ajency Moody’s tuut ti kredit wërter fon te USA runer xtele 2 xtune • Ti USA hon sayn hoochste petaytung fon te petaytungs ajency Moody’s ferloer. Een uersach fer tiise ëntxlus is te wakstum fon te natsioonal xult. Ti rating ajency Moody’s hot sayn hooch kreet fon te USA raus kehool. Moody’s hot tas lant sayn kredit rating fon te hooch AAA rating pis Aa1 am fraytaach runer kexmis. Ti rating ajency hot ti ferkreesung fon te natsioonal xult un ti intrese woo ti USA fer sayn xult petsaale mus, wii uersache kenënt. In te yoore woo rom kang sin, hon ti rechiirunge fon te USA un te Kongres fon te USA net aktsioone kenom keeche te “treen fon kroose yoerliche budjet defisite un ti kreesere intrese khoste”, saat Moody’s. Ti budjet planse woo yets am xpreche sin, tuun aach net saan tas ti rechiirungs ausgaawe un ti defisite in te welts kreeste ekonoomii sich ferkreese khëne. Am aanfang, waar khee komentaar fon te rechiirung fon te USA. Moody’s is te letste fon te tray kroose reete woo sayn hooche reete fon te USA raus kehool hot. S&P un Fitch hate tas xon in te foer yoere kemacht. Moody sayn aktuaal ëntxlus is een xlechte naychkheet fer te presitënt fon te USA, Donald Trump. Aach am fraytaach, te presitënt sayn pleen fer ti xteuer xmayse, hate xon ferloer kang im Haus Budget Komitee, weeche ti oppositsioon fon te politiker in te repuplikaanix partii fon Trump. Mit en kesets, wil Trump ti xteuer xtek ferxtërke, woo etliche fon tëne xon paseyert waare in sayn eyerxte presitëns tsayt in 2017. Awer, ti xraywer saan tas ti pleen khëne mee wii 5 trilyone dolaare ekstra xulte fon te USA in te lëngte fon en yoerhunert pringe. Tas is unruichheet tswixich fiile repuplikaane am pringe. Fiif repuplikaanixe mitkliiter fom Haus Budget Komitee hon sich tesweche keeche Trump kextëlt un, mit te Temokraate, hon ti pleen ferpoot.