“Tuu nët mee ti Amerika fernichte!” – Tausente proteste keeche Trump in te USA un Europa

WËLT “Tuu nët mee ti Amerika fernichte!” – Tausente proteste keeche Trump in te USA un Europa 25 minute • 2 minute leese tsayt Unter em motto “Hënt uf!” Proteste keeche te Presitënt Trump un sayn radikaale politik paseere in te USA sayn xtet uf em kanse lant. Mee wii 20.000 layt tuun sich in te haupt xtat Washington samele. Es kept aach manifestatsioone keeche ti US rechiirung in fiile europeyxe xtet. Noo phaar woche fon Donald Trump sayn nay rechiirung, is en resistens am forme keeche te presitënt fon te USA un sayn rechiirung. Tausente hon am samstach in fiile xtet fon te USA demonstreyert. In te haupt xtat Washington, tausente layt hon uner em slogan “Hënt uf!” in te Natsionaal Mall Park ticht am Wiite Haus, fer sayn unruichheet aus xpreche iwer te repuplikaaner un sayn aanreetner Elon Musk. Tii waare ti kreeste anti-Trump manifestatsioone tsayt tëm sayn tsurik khom ins Wayse Haus. Es waare aach fersamlunge keeche Trump in fiile europeyxe xtet. Ti protestante in Washington hon xrifte mit xlogane ketraa wii “Niks mayn presitënt!”, “Tuu net mee ti amerikaanixe layt fernichte!”, “Schaam fer Trump!”, “Hënt uf te rechtsstaatlichkheet!” un “Hënt fon te Sosiaal Sekuriteet.” En loos aliansa fon linkwiste krupe hot aan keruuf fer proteste keeche Trump in mee wii tausent xtet fon te USA mache. Ti demonstrante kritisiere, tswixe anere, ti aktsioone fon Trump keeche ti imikrante oone rechtliche resitëns, ti xnit fon te federale aareas un rechiirungs prokrame, un ti agressiif tariif politik fom presitënt. Tii tuun aach te 78 yoer alt man aan klaape tas eyer ti temokrasii un ti rechtsstaatlichkheet uner xtele tuut. “Es is aarich soriche se siin was mit unser rechiirung paseyert un tas ti separatsioon fon te macht komplet iwer kefaar kept”, saat ti 66 yoer alt protestantin Jane Ellen Saums. Ti aktiwist fon te siwil rechte, Graylan Hagler, hot kesaat tas ti rechiirung fon Trump hot “een xloofende rise” uf kewakst. “Meyer tuun net setse, tuun net ruich plaype un tuun net fat keen.” Protëstante forme en mënxliche krupe um en amerikaanixe flayx rom, im Ocean Beach in San Fransisko Tas waare ti kreeste proteste keeche Trump, tsayt eyer im yanuar aan kenom hot. Awer, fiil weenicher demonstrante waare erwaart kep wii noo em eyerxte inwanerung fon Trump im yoer 2017, wii xon en halpe milioon layt mit kehal hon in en kroose fersamlung in Washington, woo te Fraae Marx kenënt kep waar. Ti orkanisatoore fon te samstachs fersamlung in te haupt xtat fon te USA hate 20.000 demonstrante kewaart, awer pis am mitachs hon se een fiil heecher numer fon teelnemer ketsaycht. Ti manifestatsioone keeche Trump un Musk, woo sich aanxtrëngt fer ti xnit fon te xtaats aparat fer te rechts-populist presitënt, hon aach am samstach in europeyxe haupt xtats wii Berlin, Lothringen, Roma un Paris paseyert. “Was in Ameerika pasiirt, is yeete eene sayn propleem”, saat ti protestantin Liz Chamberlin in Londres. Trump sayn hantwerks politik tuut een “welt resesioon” pringe. Siit tëne sayn amt, hon ti US politiker en radikaal politik agenda foer kexlaa, woo ti auslëntixe politik, ti ​​mikratsioons politik un ti ekonoomixe politik inkluut. Te 78 yoer alt man is am klaawe an unkeweenliche macht fer en US presitënt, was en flus fon prosëse kefiert hot. Ti kritiker tuun Trump aan klaape tas er kroose xaate fer ti temokrasii im lant mache tuut. Ti Temokraate woo in te oppositsioon sin keeche Trump sayn foerkhomer, Joe Biden, xteen tswixe te xnelheet woo te repuplikaaner sayn politik implementiert.