Milliardeere tuun sich fon Trump ap lënke – Tee tuut se aan muute fer net “xwach un xwach” sin

WELT Milliardeere tuun sich fon Trump ap lënke – Tee tuut se aan muute fer net “xwach un xwach” sin 1 xtun • 3 minute leese tsayt Mit sayn tariif kriich, tuut te US Presitënt Trump imer mee sayn rayche unerxtitsung keeche iim xtele. Soo kaar te tech-miliarder Elon Musk is sich ap lënke. Te rechiirente fon te Fonds, Bill Ackman, saat tas Trump een “kroose feeler kemacht hot, woo fon xlechte mathematike pextimt kep waar.” Te Presitent fon te USA reactuert uf sayn aychne aat. Ti xëfe fon te kexefte un milioone mënxe waare lang tsayt wii natierliche ferwante fon tëm US Presitënt Donald Trump aan kesiin kep. Awer mit sayn tariif kriich keeche ti kans welt, hot te repuplikaaner etliche fon sayn unerxtitsung keeche iim kexmis. Soo wii ti Washington Post saat, hot te teknolokii miliooneyer un Trump sayn aanreetner Elon Musk ferkheert fersuucht am letste wochënent fer Trump tsurik lose. Noo wayter kritisie fon sayn tarife, hot Trump en nay krupe am montach aan kefang un hot soo kaar en ënglix wort fer tii inkexrip: “Panicans” – in taytx “panic people”, woo peser pekhant is wii “kaniin fiis”. Tii sin “xwache un xwach layt” woo net in sayn ekonoomixe politik klaawe, hot Trump in te xprooch fon en preeticher kexrip uf sayn online tiinst Truth Social. Mit kraft, koraaj un ketult wërt ales kroos sin, hot er fer al ti tswayfele kesaat. “Say nët xwach! Say nët xlëcht!” Awer, ti krupe fon skeptiker sin am wakse in te licht fon te aktsioons marke woo am paseere sin un ti tsweet welt kriich fon Trump sayn tarife, woo am mitwoch in kefaar sin. Tas sin ti 20% tarife keeche ti EUA un ti mee wii 40% tarife keeche ti asiatixe natsioone wii Vietnã un Kamboya, woo aach tëkstiile im naame fon te USA produseere. Te US Fonds Manager un Miliarder Bill Ackman, woo Trump in te elektoraal kampanye unerxtitst hat, waar kans xpasich in sayn komentaare. In een rees fon online notisye iwer X, hot eyer te presitënt aan kexprooch tas eyer een “nuklear kriich keeche yeete lant fon te welt” in kextelt hot. Te 58 yoer alt man hot ti US rechiirung kritisiert wayl se ti tarife fon sayn hantwerks partnerxafte uf en kans ekstra niwel kexproch hot. Trump mus sayn laaf xnël korëkiire eep eyer een “kroose feeler mache tuut, woo uf xlechte mathematike kextitst kep is”, hot Ackman kesaat. Anere kexefte fiirer wii Jamie Dimon fon te kreeste US Bank JP Morgan hon kewarnt fon te fal fon te korporatiif winxe, ti kreesere prayse fer ti US konsumente un en pau mit lang tsayt hantlungs partnerxafte. “Mayn xlimste soriche sin wii tas ti lang tsayt ekonoomixe alianse fon te welt petreft”, hot Dimon in sayn yoerlich priif fer ti aktsioons krupe kexrip. Soo kaar Trump sayn tichtste froynt un “efisiëns” aanreetner, Musk, xteet sich foer fer sich selepst ap lënke. Am wochënent, hot eyer en fray hantlungs zone tswixe Nort Amëërika un te EU aan keruuf, oone tas te Presitënt ti sache kommentiire teet. Am aanfang fon te woch, hot Musk en wiiteo puplitseyert fon tëm xlechte amerikaanixe ekonoom Milton Friedman fon 1980 uf sayn online tiinst X. In tëm, hot te pekhante ekonoom fer ti layt aus keleet tas en simpel xraywer fon komponiinte fon te kans welt kemacht kept. Tës wëche is en “fray marke” un “harmonii un friit tswixe te foleke fon te welt” soo important, saat Friedman. Er is am pexraywe te yoerhunert lang konsensus woo Trump yets kebrocht hot. Awer, Trump wëyer net Trump wën eyer sayn kritiker aan heere teet. Im keeche teel, hot eyer noch mool te tariif konflikt mit China eskaliert un hot Peking mit tarife fon mee wii 100 prosent aankefang am mitwoch – neekst tas tswaay mool soo fiil wii ti foer heyer aan kesaat hate. Trump hot ti tariif “pause” woo ti xëfe fon te kexefte un ti ekonoome ferlangt hon fer ti ferhantlung un fer ti aktsioons marke ruich hale, ap kexmis. “Meyer tuun tas net kuke”, hot te presitënt kesaat, wii eyer mit sayn froynt, te israelite premier ministëer, Benjamin Netanyahu, im Wiite Haus waar. Trump sayn aanxtelung keeche Israël tsaycht wii ernst tee is. Tee hot soo kaar 17 prosent fon sayn froynt “Bibi” kexikt. Trump hot sich ferwunert tas neekst al sayn hantwerker hon tëm yets aan keruuf un wolte ferxpreche. Ti layt hon tëm soo kaar tinge aan kepoot woo eyer nii ferlangt hot. Tas is kroos, saat Trump: “Ti tarife tuun tas lant aarich raych mache.”