Tarife planse: Donald Trump kept sich in ti obligatsioons marke

Frankfurter Algemeine Zeitung Tarife planse: Donald Trump kept sich in ti obligatsioons marke fon Winand von Petersdorff • 1 xtun • 4 minute leese Es mus en xpasich momënt sin, wii te sekreteer fom Komersium, Howard Lutnick, te Tresorier Sekretariat Scott Bessent, un te Presitënt fon te USA, Donald Trump, sich paysamer kextelt hon, wii te letste ti notisye fer sayn aychne plats kexrip hot, Woerheet Sosiaal: Teel fon te tarife wërt fer 90 taache sustëntiert kewe. Lutnick hot iwer Trump sayn ekstraordinaare mediums kontripuytsioon fon sayn presitëns kexproch, wën Bessent xpeeter wërter kesuucht hot foer te jornaliste fer ti kroosheet fon Trump sayn koraaj un sayn ekstraordinaare kewoonheete fer ti peste ferhantlungs positsioon fer sich selepst se sicher lose. Niks khan tas mache wii Trump, hot Bessent mit eere kesaat. Ti notisye: ti welt is am siin fon en soriche kexnitne strateejii fom presitënt woo yets in ti neekst phase rin kang is. Ti soo kenënte retsiproke tarife fer 60 natsioone wëre fer 90 taache sustëntiert kewe, soo tas tëne sayn importatsioone yets aanfangs en basis tariif fon ploos 10% sin, mit ferxiitne anere tarife. Trump hot te hantwerks kriich keeche China eskaliert, awer, un ferlangt yets en drakonixe 125% tariif uf ti importatsioone, neekst ti friirixe tarife. Trump hot en manktem an respëkt un represalias fon Peking wii ti uersache kenënt. En mee weltliche interpretatsioon fon tëm kroose ferhantlungs xëf sayn pluut, kleene tariif moratorium is tas Trump sich ketswung hot sich aan kewe, wayl, neekst ti kanse kroose ferluste uf te aktsioons marke un ti kroose waarnunge fon en US resesioon un en weltwayt ekonoomixe kris, waare ti eyerxte simpoole fon en neekst finansial kris am uf xtaye. Ti US Tresorier waare te xtek phunkt . Ti ferkhaafung fon te tseen yoer fon te USA hat kroose unruychkheete keprung. Tas is khee wuner: tiise Tresorier is ti haupste sicherheet fon ale. Es tiinst net ploos als referëns phunkt fer kredit, obligatsioone un sicherheete, awer aach als sicher plats fer inwanerer fon te kans welt. Soo, is es traditsioonel tas ti aktsioons inwester sich fon wayter aktsioons marke xitse, torich sayn kelt in ti US Treasury Obligatsioone se xtele. Ti marke peopachter waare noch mee ferwunert wii, tsayt am montach, wën ti aktsioons preetiche aach sayn runer kefal in te kans welt wayter kehal hon, ti rente fon te obligatsioone hon aankefang se wakse. Ti kreesere rente keen hant an hant mit een falxe obligatsioons prays. Am mitwoch, hot ti rente khorts tsayt pis 4,47 prosent kewakst, ploos fer xpeeter een pisye runer keen. Am ën fon te letste woche, waar ti ërnt ploos uner fier prosent. Ti banke hon nootwënichkheete kepleent . Hedge funds hon anschiins een xlisel rol kexpiilt; tii hate fiil kelt keleent un hon in rechiirungs obligatsioone kexpaart un waare yets fon te kreewer ketswung kep fer se ferkhaafe. Im kansem, hon ti inwanerer sich aan kextrëngt uf tas kelt, im licht fon te marke volatiliteet. Ti xwiirichkheet fon te situatsioon is ketsaycht kep torich en notisye fon te Deutsche Bank strateejist George Sarevelos fer ti kliënte am mitwoch: "Wën ti xlechte xwiirichkheete im US Tresorier marke wayter keen, siin mer khee anere optsioon fer ti Fed wii ti interwentsioon mit nootwënichkheete fon te US Tresorier marke fer te obligatsioons marke stapiliseere." Ti unkliklich, khorts tsayt premier ministëer fon te Inglaterra, Liz Truss, hot ti xwiirichkheete kelërnt tas ti finansial marke peweechunge hooch politixe relewans hon khëne, wën ti inwanerer reactsioone uf sayn fiskal politik fon xteuer xmayse un waksende natsioonal xulte, torich ti flicht fon te Ingleesix Pound un Rechiirunge Obligatsioone. Ti kris hot ti Bank fon Ënglant tswingt en nootwënich prokram aan fange fer ti obligatsioone se khaafe – un Liz Truss hot sich in oktoower 2022 noo ploos siwe woche im amt wech kexmis. Te Moron Risiko Premium Te Ingleesix Analyst Dario Perkins hot te term “moron risiko premium” in tee tsayt kexrip. Tas is ti premium fon te rechiirungs obligatsioone woo tas risiko traan hale tas en moron ti rechiirung rechiire tuut. In te USA, ti Press, weenicher inkexpërt kep waar noo Trump, waar ti eyerxt woo sich kefroot hot ep soo en laycht risiko premium yets aach fer ti US Treasuries petsaalt kewe solt. Soo wii ti Financial Times saat, hot Perkins kesaat tas ti USA noch en lang weech fon en Liz Truss momënt waar, awer in te selwich tsayt hot eyer kewarnt tas wën ti Federal Reserve fon te Wiite Haus atakëre teet, es weyer fiil xpreche iwer en "Mar a Largo Akkort", massiv arbitraar tarife waare in kextelt kep, un auslëntixe tiire fon te USA waare mee unkefeyer th khont uf xtaye. Tiise letste aspekt kriit en kreeser relewans wayl China, woo uner massive atak kep waar, hot 760 milioone dolaare in te USA kehal, noo en list fom Tresorier Departamento. Tas macht tas China ti tsweet kreeste auslëntixe lant hiner Japan un foer Kroos Pritanye.