US-Rapport klaapt tas laboratoorium unklik in China pewayst hot

WELT US-Rapport klaapt tas laboratoorium unklik in China pewayst hot 1taach • 2 minute leese tsayt Wii is te SARS-CoV-2 uf ti welt khom, woo en weltwayt pandemii keprung hot? Mitkliiter fom Rechiirente Khërperxaft fon te USA hon yets en rapport foer kexlaa woo ti theorii fon te laboratoorium unklik unerxtitse wil. 30 ëxperte sin interwiews kemacht kep un mee wii een milioon tokumënte sin kekukt kep. Am ën fon 2019 sin ti eyerxte layt fon China krank kep mit em Covid-19, woo fom SARS-CoV-2 koronawirus kefaar kep waar. Noo en tswaay yoer unersuuchung fon te orikinaale fon te korona-pandemii, hon ti USA en rapport foer kexlaa woo ti theorii fon en laboratoorium unklik in China unerxtitse wil. Te SARS-CoV-2 virus “is woerxaynlich wii een resultaat fon een laboratoorium orer forxungs unklik uf kextii”, saat te 520 sayte rapport fon een uner komite fom Haus. Te komite tuut sayn kefuntne resultaate fon 30 interwius un ti rexpekt fon mee wii een milioon sayte fon tokumënte hale. Te amerikaanixe viroloog un top-rechiirente fon te rechiirung, Anthony Fauci, waar aach interwiews kemach kep. Ti repuplikaane tuun te 83 yoer alt man aanklaache tas er kelt fer ti xinesixe sientiste iwer keprung hot, woo kesaat hon tas se te koronawirus genetix influëns hon. Wën in yuuni kefroot kep waar, hot Fauci kesaat tas es "molekulaar unmeechlich" waar tas ti fletermaus virus woo in en laboratoorium in Wuhan, China, xtuteyert kep waar, sich transformeyert hon in te virus woo ti pandemii kefiert hot. Fauci waar Mitliter fon te Rechiirente Khërperxaft fon te Corona-Kris, uner em tswaay presitënt fon te USA un sayn foerkhomer Donald Trump. Wën sayn ekspërtise fon teel fom folek hooch weyert keprung kep waar, hot te New Yorker natsioonal imer noch ti unruichheet fon Trump ketsaycht, woo ti kefaar woo te koronawirus fer ti kans welt keprung hot, fer lange tsayt unersuucht hot. Fauci waar fon rechts-krupe aan kefal un must uner poliis xitsung kextelt wëre. Laboratoorium unklik orer transmisioon torich tiere? Ti federale autoriteete fon te USA, ti Welts Kesuntheets Organisatsioon (OMS) un ti sientiste fon te kans welt hon unerxiitliche konklutsioone kemacht iwer ti orixin fon tëm koronawirus: ti meyerxte fon tëne klaawe tas te virus sich fon tiere in China ferprayt hot. En unersuuchung fon te US Secret Service hot im letste yoer ketsaycht tas te virus fiilaycht genetix modifitsiert kep waar un fon en laboratoorium in te xinesixe xtat Wuhan raus kang is. Ti eyerxte mënxliche infektsioone mit em koronawirus sin tat paseyert. Ti korona-pandemii hot 1,1 milioone layt in te USA um keprung. Tëm noo ti sifer fon te WHO fon 2023, waar ti numer fon te toote uf te kans welt 20 milioone. Te Coronavirus hat sich fon China pis an ti kans welt ferprayt tsayt am ën fon 2019 un, neekst ti kans welt, hot eyer ti xliisunge, ti reese restriktsioone un fiile anere xlimste efekte keprung.