Trump: Amerika mus net nootwenich fon kesetse rechiirt wëre, awer fon mëner

Rolsteen Trump: Amerika mus net nootwenich fon kesetse rechiirt wëre, awer fon mëner Nikki McCann Ramirez • 17 h • 4 min leese Te Presitënt Donald Trump is am ën fon sayn eyerxte 100 taache fon sayn tsweet rechiirung. Un ti situatsioon khomt etwas xlimer wii tas eyerste mool. Ti eyerxte moonate fon Trump sayn tsweet tsayt waare markiert kep weche sayn rechiirung sayn fersuuchunge fer sayn agenda uf tas lant se xtele, aach wën tas ti natsioon sayn xtellungs printsiipie xpoote petayte teet. Am fraytaach, hot te tsaytung Time en interwiew mit Trump puplitseyert, woo eyer iwer sayn eyerxte 100 taache kexproch hot. Te Presitent Trump un te Rechtsstaat . Te hooche politik korrespondënt fon te Time, Eric Cortellessa, un te redaktoor Sam Jacobs hon te presitënt interwiews kemach, woo tas Owal Amt noch mool uf kepaut hot. Tii hon kemërkt tas Trump sich mit te flayxliche kolt-plaat aksesoore fon sayn golf-klubs un penthouses ferklayche teet. Un hot tëm kefroot iwer een portreet woo eyer fon John Adams kexrip hot. Adams hot een mool kesaat: “Meyer sin een rechiirung woo fon kesetse rechiirt kept, un net fon mëner”, hon ti interwiew kefroot. “Pist tuu mit tas eenich?” Ti rol fon John Adams sayn erlaupnis im Trump sayn Wayse Haus . Trump, woo am aanfang sich net mool erinere khont woo tas kexicht keheyert hot, waar net soo sicher. "Meyer sin en rechiirung woo fon kesetse rechiirt kept, net fon mënxe? Tan, ich tënke tas mer en rechiirung sin woo fon kesetse rechiirt kept. Awer tuu weest, yemant mus ti kesetse hale", hot er keantwort. "Soo, ti layt, mëner un fraae natierlich, tuun sicher en rol too temit xpiile. Ich teet net 100 prosent eenich sin. Meyer sin en rechiirung woo mëner in te rechts protses mit hale. Un ideaalwayse, es kept eerliche mëner wii ich." Eerliche mëner wii Trump? Weer is xon am suuche noo weech fer tas kesëts in sayn nutse se xmayse? Am aanfang fom interwiew, hot Trump ti Time kexpot tas eyer niks iwer ti meechlichkheet fon en trite tsayt wees. Awer ti layt hon tëm ferlangt tas tee tas mache solt. Un tee wees aate fer tas hin kriin. "Es kept welche pekhante loope woo kexproch kep sin. Awer ich klaawe net an loope. Ich klaawe net an loope penutse", hot Trump klaych kesaat. Tee hot noch kesaat tas eyer ‘mit ferlangre iwerfluut kep waar’ fer een trite tsayt kanditiire. Awer, wën Trump saan wil tas eyer net klaawe an ti ausnutsung fon te xlechte tinge woo in te kesetse sin, sin ti pewaysunge keeche tëm. Xpetsiaal in te imikratsioon sache. Te presitënt un sayn aanreete hon kroose aanxtrëngunge kemach fer ti yoer hunert alt kriichs mëchte wii tas Kesets fon te auslënter faynte noch mool interpreteere. Fer ti mass deportatsioone fon te imikrante oone richtiche protses aus fiire. Tee hot hunerte mëner in xrooe kexpërte in El Salvador inkexpërt, oone prosës orer ferxpreche. Un hot ti federale kerichte in yeete keleechenheet ignoriirt. Wën mer iwer te Fall fon Kilmar Abrego Garcia kefroot kep waar, en man fon Maryland woo ferkheert in te notorix CECOT-Prison in El Salvador kexikt kep waar, woo sayn tsurik khom noo te USA, woo ti Trump sayn rechiirung fom Hohe Kericht kexikt hot fer “fasiliteere”, hot te presitënt net kelos se xpreche. Tee hot fer ti Time kesaat tas eyer net ferantwortlich waar fer ti kepoote fom kericht noo keen. Orer fer ti ëntxlus iwer Abrego Garcia sayn tsurik khome mache. Tee hot kesaat: “Ich tuun tas fer mayn atwokaate lose.” Wën mer noch mool preserweyert hon, hot te presitënt noch kesaat tas eyer net te Salvador Presitënt Nayib Bukele ferlangt hat fer Abrego Garcia tsurik pringe. Wayl Bukele ‘hot kesaat tas er tas nët mache teet’. Un tee hot ti falxe aanxtelunge noch mool ketsaycht tas Abrego Garcia en xlechte MS-13 gang mitkliiter waar. Trump hot tan kesaat tas er uf kehoop kep waar fer ti meechlichkheet fon amerikaanixe mënxe in auslëntixe prisioneere. "Ich wëre froo sin tas mache wën tas legal erlaupt weyer. Meyer sin yets am noo kuke. Wën ich een persoon hon, tas wëre ekstreeme kefale sin", saat er. "Wëns tuu mich frooe tuust ep ich tas mache teet, teet ich tas mache. Awer ploos uner te konditsioon tas es legal erlaupt is." Donald Trump hot tas mëchtichste politixe amt fom lant un fon te welt. John Adams hot fiilaycht kesaat tas ti Fereenichte Xtaate fon Amërika een lant fon kesetse sin. Awer es khan sin tas es ploos ti aarwayt un te wile fon een man praucht fer se fernichte.